Í gær stóð Hugrún fyrir göngu á Smáþúfur í Esju. Þetta er þægileg ganga sem lætur ekki mikið yfir sér en eigi að síður er farið í tæplega 600 m hæð sem er litlu lægra en þegar farið er upp að Steini við Þverfellshorn.
Þegar ég sat í seinustu viku (einu sinni sem oftar) yfir kortagrunni Landmælinga í tölvunni minni sá ég að það var tiltölulega auðvelt að fara þaðan og að Kerhólakambi í Esju og síðan annað hvort niður hjá Esjubergi eða að ganga eftir Kerhólakambi alla leið að Þverfellshorni og síðan niður hjá Mógilsá.
Það var ekki vandkvæðum bundið að fá nokkra göngufélaga mín með mér í þennan leiðangur en þar sem veður og skyggni var ekki með því albesta þá létum við nægja að fara niður hjá Esjubergi.
Það er ansi bratt þarna niður og skal viðurkennt að það tók í framanverð læri og hné. Ekkert til að hafa áhyggjur af en nóg til að 5-7km hlaup þóttu mér ekki vera gáfuleg í dag og tók því hvíld. Stefni að einhverju á morgun í staðinn.
Pingback: Litið um öxl | Efst í huga