Seinustu tíu ár hefur hlaupaklúbbur Seltjarnarness átt ríkan sess í huga mér og ómældur tími farið í hlaup, göngur og annað aktívitet tengt þessum klúbbi. Nú í nánast heilt ár hef ég lítið getað fylgt félögum mínum eftir. Það þarf náttúrulega ekkert að orðlengja það hversu illa mér hefur líkað að komast ekki út að hreyfa mig almennilega. Var ég á tímabili farin að halda að nú væri kominn tími á blómaskoðun, fuglaskoðun og jafnvel ljósmyndun.
Eftir liðþófaðagerð og massíva endurhæfingu hjá sjúkraþjálfara er ég mætt aftur. Fyrsti hlaupatíminn var í gær og gekk bara þokkalega. 5km lágu að baki, reyndar farið afar hægt og gekk ég inn á milli.
Nokkrar fjallgöngur hef ég farið í nú undanfarið og allt gengið að óskum. Þannig að ég er mætt aftur og hef tekið gleði mína á ný! Af þessu tilefni tók ég aftur upp tölvuna og skellti inn nýju bloggi. Það er orðið alltof langt frá seinustu færslu og ferðasaga frá því í sumar bíður birtingar!
